21 maart Grunniger Dag

​​Wie hebben 21 maart op t Dollard College in Winschoot ain haile schiere dag had. Aal wied veur negen uur waren de eerste gastleroaren aanwezeg: Erik Hulsegge, bekìnd van zien geweldege verhoaltjes en as ain van de Noordmannen bie rtv noord, Bert Uil, schriever van o.a. de boukjes over Appie en Geeske Stainhoes oet Winschoot, en Jan Kügel, old grondschoulleroar, deden in drij klazzen de oaftrap van t projekt.

Doarnoa konden de leerlingen kaizen oet zes broeslezzen. Der kon kozen worden veur ain kennismoaken mit t Grunneger landschap deur n vouttocht onder laaiden van Schillhorn-Van Veen oet Finnewolle, mit mitwaarken van Wim Willemsen en Tonio Antema van t Dollard College. Of zai konden n stadswandeling moaken onder laaiden van stadsgids Koos Akkerman. Tiedens de rondgang mozzen zai ook foto's moaken onder begelaaiden van Elsje Vermunt, leroares van t Dollard College, en Willem Friedrich, schriever, fotogroaf en hail bekìnd mit de Grunneger kultuur. Der kon ook zörgd worden voor de inwendege mens bie de keukenbroesles. De leerlingen muiken doar onder laaiden van Ankie Prenger, van De Korenbloem oet Vraiskeloo, Truus van Bommel en Lukas Van der Veen, baaide van t Dollard College, o.a. overheerleke kniepertjes, spekkedikken en echte Grunneger mosterdsoep. Ain aandere groep ging de stad in om filmkes te moaken over t Grunnegs. Doarbie heurde ain broesles over filmkes moaken van Jeroen Bouland van de Winschoter bibeltaik. Ook aan de Grunneger toallaifhebber was docht. Zij kozen of veur de 'masterclass' van Eltje Doddema, wied en zied bekìnd as broeslesgever Grunnegs, komponist, tekstschriever en netuurlek van 'Twij körten twij langen', of veur de broesles Tjaakjes moaken (in t Nederlands beter bekìnd as 'Loesje') en t omtoalen van stripverhoalen in t Grunnegs. Dizze broesles wuir geven deur Bert Hensema van t Dollard College.

 smörns wuir der oafsloaten mit Kahoot, woarbie de leerlingen 20 vroagen kregen over t Oldambt, de Grunneger toal of de Grunneger kultuur. Aan t inde mozzen zai nog heur schierste Grunneger woord op n koartje schrieven. t Zel joe nait verboazen dat 'poedie' bie de leerlingen zwoar favoriet was. 

's middags wuir de grote finoale van Klouk speuld. De eerste twij ronden wuiren presenteerd deur Maria Tiggelaar, leroares van t Dollard College en ain van de aanpeerdjeders van t projekt, en de leste finoaleronde wuir presenteerd deur gain ain minder as Winschoter Wiebe Klijnstra, de bedenker van Klouk en de aandere helft van de Noordmannen van rtv noord. 

De dag wuir oafsloten mit ain geweldeg optreden van Sproakwotter (Harry Van Boven en Martin Blok), t Oldambtster rapduo. 

Wie kieken mit geweldeg veul plezaaier terug op dizze dag en hebben genoten van de laifde dij aal de mitwaarkende gastleroaren veur t Grunnegers haren en van de geweldege inzet van de leerlingen. Wat hebben zij n bult leerd van onze kultuur en toal vandoag. Wie haren der ain enorme put waark van, mor t was t hailemoal weerd. :)

Wie willen nogmoals aale luu dij mitwaarkt hebben hartstikke bedanken. :)